مرا دل مری جان میرا وطن ہے

مرا دل مری جان میرا وطن ہے
مری شان مری آن میرا وطن ہے

رہے گی زمانے میں توقیر ہردم
بنا میری پہچان میرا وطن ہے

کرونگا فدا جان جب وقت آیا
مرا دین ایمان میرا وطن ہے

ہلالی یہ لہراتا پرچم رہے گا
یہ سر سبز میدان میرا وطن ہے

یہاں پر میں آزاد ہوں شاد بھی ہوں
یہی ہے مری شان میرا وطن ہے

بہادر ہیں میرے وطن کے محافظ
مرا ہے نگہبان میرا وطن ہے

تلاوت سے آغاز ہوتا ہے دن کا
ہے سینے میں قرآن میرا وطن ہے

میں نازاں ہوں ہے ناز اپنے وطن پر
اسی سے ہے ذیشان میرا وطن ہے

خلوص و محبت سے لبریز ہیں سب
مرے دل کا درمان میرا وطن ہے

ملی ہیں زمانے کی شہزاد خوشیاں
نہیں کوئی ارمان میرا وطن ہے