منقبت: چشمہ کُھلیا نور حقانی
Poet: Hazrat Sakhi Sultan Pir Mohammad Abdul Ghafoor Shah Rehmat-ul-Allah Alayh By: Nasir Hameed, Lahoreدر شان
سلطان التارکین
حضرت سخی سلطان سیّدمحمد عبداللہ شاہ مدنی جیلانی رحمتہ اللہ علیہ
چشمہ کُھلیا نور حقانی
شاہ عبداللہؒ فیض رسانی
احمدپور وِچ نور برسدا
جتھے شاہ عبداللہؒ وسدا
واقف لوح قلم تے مسدا
ہے وچ ملک بہاول خانی
شاہ عبداللہؒ فیض رسانی
عَرف عجائب عارف باللہ
طالب ویکھ عجب سلسلہ
شکر پڑھن اَلحمد للّٰہ
ویکھ جمال رسولؐ نشانی
شاہ عبداللہؒ فیض رسانی
طالب صادق سالک آون
لین مراداں جھولی پاون
کر تلقین تے راہ وکھاون
کھول سناون راز نہانی
شاہ عبداللہؒ فیض رسانی
رمزاں مخفی جگ وچ ہلیاں
مَلک فلک تے مارن جھلیاں
دریاں نور کرم دیاں کھلیاں
تھئی سب حور پری مستانی
شاہ عبداللہؒ فیض رسانی
فیض فیاض دے ویکھ پسارے
مارے جوڑ اناالحق نعرے
نالے اَن حد پیا طوارے
چال مجازی ہوگئی فانی
شاہ عبداللہؒ فیض رسانی
عاشق بے سر پھرے مسافر
توڑے لوگ سدے چا کافر
واللہ عار نہیں کجھ آخر
ویکھ چشمہ لعل یمانی
شاہ عبداللہؒ فیض رسانی
خوبی نرگس ناز نظر دی
نیتی طاقت ہوش صبر دی
عبدلؔ آہی لیل قدر دی
واہ روشن او سِرّ سبحانی
شاہ عبداللہؒ فیض رسانی
چشمہ کُھلیا نور حقانی
شاہ عبداللہؒ فیض رسانی
