نازشِ مرسلاں صد سلام آپ پر
Poet: Dr. Muhammed Husain Mushahid Razvi By: Dr. Muhammed Husain Mushahid Razvi, Malegaonرحمتِ دوجہاں صد سلام آپ پر
شاہِ کون و مکاں صد سلام آپ پر
آپ ہوتے نہ گر کچھ بھی ہوتا نہیں
باعثِ کن فکاں صد سلام آپ پر
آپ آئے تو ظلمت جہاں سے مٹی
نورِ رب بے گماں صد سلام آپ پر
آپ ہیں بے قراروں کے آقا قرار
وجہِ تسکینِ جاں صد سلام آپ پر
آپ نے سب کو رب سے مِلایا شہا
رہبرِ انس و جاں صد سلام آپ پر
بے زباں جانور استغاثہ کریں
مرکزِ بے اماں صد سلام آپ پر
آپ ہیں نائبِ خالقِ کبریا
نازشِ مرسلاں صد سلام آپ پر
ہیں شفیع الورا آپ ہی ، ہوگا یہ
روزِ محشر عیاں صد سلام آپ پر
ہو مُشاہدؔ سے بے کل پہ لطف و کرم
آپ ہیں مِہرباں صد سلام آپ پر
Rate it: 
Views: 540
31 Oct, 2016
More Religious Poetry
