وقت ہی کم تھا فیصلے کے لئے
Poet: ضیاء مزکور By: Danish, Daduوقت ہی کم تھا فیصلے کے لئے
ورنہ میں آتا مشورے کے لئے
تم کو اچھے لگے تو تم رکھ لو
پھول توڑے تھے بیچنے کے لئے
گھنٹوں خاموش رہنا پڑتا ہے
آپ کے ساتھ بولنے کے لئے
سیکڑوں کنڈیاں لگا رہا ہوں
چند بٹنوں کو کھولنے کے لئے
ایک دیوار باغ سے پہلے
اک دوپٹا کھلے گلے کے لئے
ترک اپنی فلاح کر دی ہے
اور کیا ہو معاشرے کے لئے
لوگ آیات پڑھ کے سوتے ہیں
آپ کے خواب دیکھنے کے لئے
اب میں رستے میں لیٹ جاؤں کیا
جانے والوں کو روکنے کے لئے
Rate it: 
Views: 144
02 Jul, 2024
More Zia Mazkoor Poetry
