چشمِ دل گیر منتظر ہے مری

چشمِ دل گیر منتظر ہے مری
پھر کوئی ہیر منتظر ہے مری

اس لئے گھر کو لوٹ آؤں گا
اس کی تصویر منتظر ہے مری

پھر بکھرنے کو ہیں عناصرِ جاں
ضرب و تکسیر منتظر ہے مری

آ رہی ہے صدائے چھن چھن چھن
کوئی زنجیر منتظر ہے مری

گھاؤ سینے کے بھر گئے شاید
شستِ نخچیر منتظر ہے مری

لے چلو مجھ کو سوئے دار و رسن
رسمِ توقیر منتظر ہے مری

شوقِ آوارگی سلام تجھے
راہِ تعمیر منتظر ہے مری

آئینے مجھ کو ڈھونڈتے ہیں امـؔر
تزکِ تطہیر منتظر ہے مری