چٹکیاں

آج تک زندہ
دیکھنا یار شام کا اخبار
کون زخمی ہیں کون زندہ ہیں
شکر ہے ان میں اپنا نام نہیں
گویا ہم آج تک تو زندہ ہیں

ہائے اللہ
ساس بہو کا جھگڑا جب ویمن تھانے میں آیا
تفتیشی افسر نے بس دو فقروں میں نمٹایا
اللہ ایسی نائیس میچنگ تم نے کس سے سیکھی
اللہ یہ جوڑا تم نے کس ٹیلر سے سلوایا

میں آتا ہوں
کشش ہے کس بلا کی دیکھنا اس ملک میں یارو
جسے دیکھو وہ کہتا ہے میں امریکہ جاتا ہوں
ادھر ایک دلبرانا شان سے امریکہ کہتا ہے
کہ صاحب آپ کیوں زحمت کریں میں خود ہی آتا ہوں

دور نو
کبھی دیکھتے تھے جو تفسیر قرآن
وہ اب دور نو کی پھبن دیکھتے ہیں
لگائی ہے لو جب سے امریکہ سے
سنن کی جگہ سی این این دیکھتے ہیں

پرچی دکھائیے
پرچہ بھی لاجواب ہوا ہے میرا جناب
اب تجربے میں میرا علم آزمائیے
فرمایا ممتحن نے عجب گاؤدی ہیں آپ
پرچے پہ خاک ڈالئے٬ پرچی دکھائیے