اشک آنکھوں میں رہے بن کے کمائی اپنی

Poetرشید حسرت Submitted byرشید حسرت
Text size

اشک آنکھوں میں رہے بن کے کمائی اپنی
کوئی اجرت کسی محنت کی نہ پائی اپنی

جس نے الزام رکھا ہم پہ مکر جانے کا
پیش کرنی ہی نہیں اس کو صفائی اپنی

غم غلط کرنے کا کیا ہم نے لیا ہے ٹھیکہ
جس کو دیکھو وہی دیتا ہے دہائی اپنی

چاہتے تھے کہ اسے گھاس نہیں ڈالیں گے
داستاں اس نے ہمیں پھر بھی سنائی اپنی

بچے بھوکے ہیں مرے، تین دنوں سے لیکن
باسی روٹی بھی چھپا لیتا ہے بھائی اپنی

آنکھیں کم ظرف ہیں سب راز اگل دیتی ہیں
صورتِ حال بہت ہم نے چھپائی اپنی

اہلِ دنیا نے ہمیں رد جو کیا ہے حسرتؔ
دل نے اک اور طرح بزم سجائی اپنی

Related tags on Parveen Shakir poetry

Copied