ایمان کی اَساس

عشقِ رسولِ پاک ہے ایمان کی اَساس
نعتِ رسول راحت و درمان کی اَساس

تخلیقِ نورِ پاک سے ظاہر ہے بالیقیں
ذاتِ رسول روح و دل و جان کی اَساس

گنجینۂ غیاب و شہود سینۂ نبی
علمِ رسول علوم و ایقان کی اَساس

وحیِّ خدا ہے آپ کی ہر بات بے گماں
حدیثِ رسول جملہ ایقان کی اَساس

مکہ کی فتح پر وہ اعلانِ در گزر
طرزِ رسول رحمت و احسان کی اَساس

جتنے فصیح بلیغ تھے سب گونگے بن گئے
خُطَبِ رسول بیان و لَسّان کی اَساس

ڈوبا رہے ثنا میں مُشاہدؔ ہے بے گماں
یادِ رسول رحمت و غفران کی اَساس