غم دوراں کا مداوا غم جاناں بھی نہیں

غم دوراں کا مداوا غم جاناں بھی نہیں
زیست دشوار نہیں ہے تو کچھ آساں بھی نہیں

عرصۂ دہر سے ہم اہل جنوں کو نسبت
اس کی وسعت بہ حد عالم امکاں بھی نہیں

ہر نفس ایک خلش سی ہے رگ جاں کے قریب
اور نشتر کوئی پیوست رگ جاں بھی نہیں

دیکھیے وقت نے کس کس کے اڑائے پرزے
ان کا دامن بھی نہیں میرا گریباں بھی نہیں

ایک ہی مرد حق آگاہ ہے بندہ یا رب
کہ یہ کافر جو نہیں ہے تو مسلماں بھی نہیں

منزل غم سے گزرنا ہے اور اس پر جابرؔ
دشت وحشت میں کسی شوخ کا داماں بھی نہیں