محمد کا روضہ نظر آ رہا ہے

تصو ر یہ میرا کہاں جا رہا ہے
محمد کا روضہ نظر آ رہا ہے

مسرت کے آنسو بہے جا رہے ہیں
مگر دل یہ ڈوبا چلا جا رہا ہے

بیاں حال کوئے نبی کیسے کیجیے
جو دیکھا ، نہیں وہ کہا جا رہا ہے

نہیں سلسلہ تھمتا فریادیوں کا
کوئی آ گیا ہے ، کوئی آ رہا ہے

اٹھے گا ضرور ان کا دست شفاعت
خوشی سے یہ سینہ تنا جا رہا ہے

گدائے در مصطفی ہو گئے ہیں
کہ رتبہ ہمارا بڑھا جا رہا ہے

‘ حسن ‘ مانگ لیجے در مصطفے سے
غلاموں کا دامن بھرا جا رہا ہے