Khar-O-Khas To Uthen Rasta To Chale

khar-o-khas to uthen rasta to chale
main agar thak gaya qafila to chale

chand suraj buzurgon ke naqsh-e-qadam
khair bujhne do un ko hava to chale

hakim-e-shahr ye bhi koi shahr hai
masjiden band hain mai-kada to chale

us ko mazhab kaho ya siyasat kaho
khud-kushi ka hunar tum sikha to chale

itni lashen main kaise utha paunga
aap inton ki hurmat bacha to chale

belche laao kholo zamin ki tahen
main kahan dafn huun kuchh pata to chale