Theek Hai Khud Ko Hum Badalte Hain

Theek Hai Khud Ko Hum Badalte Hain
Shukriya Mashwaraat Ka, Chalte Hain

Us Ke Pehlu Se Lag Ke Chalte Hain
Hum Kahin Taalne Se Talte Hain

Main Usi Tarah To Behalta Hoon
Aur Sab Jis Tarah Behalte Hain

Ho Raha Hoon Main Kis Tarah Barbaad
Dekhne Waale Haath Malte Hain

Hai Woh Jaan Ab Har Ek Mehfil Ki
Hum Bhi Ab Ghar Se Kam Nikalte Hain

Kya Takkaluf Kare Yeh Kehne Mein
Jo Bhi Khush Hai Hum Uss Se Jalte Hain

Hai Us Se Door Ka Safar Darpesh
Hum Sanmbhle Nahin Sanmbhalte Hain

Hai Ajab Faaisle Ka Sehra Bhi
Chal Na Padiye To Paon Jalte Hain

Tum Bano Rang, Tum Bano Khushboo
Hum To Apne Sukhan Mein Dhalte Hain

Hum Koi Bad-Mua’amla To Nahin
Zakhm Khaate Hain, Zaher Ugalte Hain

Shaam Furqat Ki Lehlaha Uthi
Wo Hawa Hai Ke Zakhm Phalte Hain