Yun Bari Der Se Paimana Liye Baitha Hun

Yun Bari Der Se Paimana Liye Baitha Hun

koi dekhe to ye samjhe ki piye baiTha hun

aaKHiri naw na aai to kahan jaunga

sham se par utarne ke liye baiTha hun

mujh ko malum hai sach zahr lage hai sab ko

bol sakta hun magar honT siye baiTha hun

log bhi ab mere darwaze pe kam aate hain

main bhi kuchh soch ke zanjir diye baiTha hun

zindagi bhar ke liye ruTh ke jaane wale

main abhi tak teri taswir liye baiTha hun

kam se kam ret se aankhen to bachengi 'qaisar'

main hawaon ki taraf piTh kiye baiTha hun