Zindagi

Zindagi Jo Mujhe Muddaton Aazmaati Rahi
Har Lamha Meri Mushkilon Ko Barhaati Rahi

Jeene Ko To Main Yoon Hi Zindagi Jeeta Raha
Main Saans Leta Raha Woh Karam Farmaati Rahi

Musibaton Ka Hans Kar Maine Saamna Jo Kiya
Woh Mujh Par Aur Bhi Musibatein Dhaati Rahi

Main Uski Nawazishon Par Muskuraata Raha
Aur Woh Tanzia Mujh Par Muskuraati Rahi

Zindagi Jeene Ka Saleeka Na Aaya Mujhe
Shayed Isi Liye Woh Mujhe Sataati Rahi

Ab To Baaki Na Rahi Kisi Cheez Ki Talab
Des Parades Woh Mujhe Itna Phiraati Rahi

Kisko Rafeeq Samjhoon Aur Kisko Raqeeb
Apni Parchai Se Bhi Mujhe Daraati Rahi

Bhari Mehfil Mein Khud Ko Mehsoos Kiya Tanha
Mujhe Har Lamha Yeh Kiski Yaad Aati Rahi