خاکِ طیبہ

خاکِ طیبہ کی طلب میں خاک ہوجاے حیات
رنج و غم درد و الم سے پاک ہوجاے حیات

زندگی کی زندگی ہے عشق و الفت آپ کی
حُبِّ احمد گر نہ ہو خاشاک ہوجاے حیات

اُسوۂ سرکار کا ہو جو کہ پیرو روز و شب
اس کی تو پھر حاملِ ادراک ہوجاے حیات

داغ ہاے عشقِ نبوی سے مُزّین قلب ہو
سب خیالاتِ غلط سے پاک ہوجاے حیات

بہرِ طارق ، خالد و سلمان و بوذر یانبی
دشمنانِ دین پر بے باک ہوجاے حیات

گر مُشاہدؔ سنتِ سرکار اپنالیں سبھی
زہرِ گنہ کے واسطے تریاک ہوجاے حیات