دل خوں ہے غم سے اور جگر یک نہ شد دو شد

دل خوں ہے غم سے اور جگر یک نہ شد دو شد
لب خشک ہیں تو چشم ہے تر یک نہ شد دو شد

رسوا تو نالہ کر کے ہوئے لیکن اس نے یار
دل میں ترے کیا نہ اثر یک نہ شد دو شد

اول تو ہم کو طاقت پرواز ہی نہ تھی
تس پر بریدہ ہو گئے پر یک نہ شد دو شد

پایا نہ ہم نے سود محبت میں یار کی
اس پر بھی پہنچتا ہے ضرر یک نہ شد دو شد

چھڑکا مرے جگر پہ نمک غیر سے رہا
پیوستہ مثل شیر و شکر یک نہ شد دو شد

آوارہ جوں صبا ہوں پر اب جستجوئے یار
رکھتی ہے مجھ کو خاک بسر یک نہ شد دو شد

مشکل تھا دیکھنا ہی ترا تس پہ روز وصل
لائی نہ چشم تاب نظر یک نہ شد دو شد

نالاں ہم اپنے اشک کے ہاتھوں تھے اب بقاؔ
بہنے لگیں ہیں لخت جگر یک نہ شد دو شد