وقت کا مرثیہ

جس ملک میں حاکم ڈرتے ھوں
دھشت گردی سے مرتے ھوں

جب گھر میں بلائے جاتے ھوں
بندوق کے سائے جاتے ھوں

جہاں عصمتیں صبح و شام لٹیں
جہاں خاص لٹیں جہاں عام لٹیں

جہاں دین لٹے جہاں دھرم لٹے
جہاں پیار لٹے جہاں بھرم لٹے

جہاں معبد خوں میں نہاے ھوں
جہاں سب منظر دھندلاے ھوں

جہاں ہر سو ظلم کے پہرے ھوں
جہاں غم کے موسم ٹھہرے ھوں

جہاں منصف و حاکم اندھے ھوں
جہاں مکروفریب کے دھندے ھوں

جہاں صبحیں کالی کالی ھوں
جہاں راتیں جیسے گالی ھوں

جہاں فکر اور فن بکاؤ ھوں
جہاں تن اور من بکاؤ ھوں

جہاں مہنگائی کی ڈائن ھو
جہاں رکھوالا ھی خائن ھو

ہر آدم زاد سے اے لوگوں
اپنے ھمزاد سے اے لوگوں

صد ادب ھمیں یہ کہنا ھے
کب تک ھمیں یہ سب سہنا ھے

اقبال نے کب یہ سوچا تھا
قائد نے کب یہ چاہا تھا

کہ ایسا پاکستان بنے
جو ظلمت کی پہچان بنے