کرتا رہوں گا

تری چاہ کا دم میں بھرتا رہوں گا
ترا ذکر یارب میں کرتا رہوں گا

مری مشکلیں ہوں گی آسان خود ہی
جو حمد و ثناء تیری کرتا رہوں گا

وِلا تو عطا کردے اپنی خدایا
میں چاہت میں تیری نکھرتا رہوں گا

مجھے اپنی رحمت کی خیرات دے دے
دعا تجھ سے ہر دم یہ کرتا رہوں گا

رہا تیرا لطف و کرم جو ہمیشہ
قیامت تلک میں سنورتا رہوں گا

مِرا خاتمہ ہو مع الخیر مولا
یہی التجا تجھ سے کرتا رہوں گا

ہیں محبوب تیرے جو دونوں جہاں میں
فِدا جان و دل ان پہ کرتا رہوں گا

نبی ناخدا ہیں سفینے کے یاسرؔ
میں طوفاں سے ہر دم ابھرتا رہوں گا