کیہ دسدا

اوہ کریر دے رکھ تھلے
کلا بیٹھا سی
کدے خلاواں
کدے ننگے سمان دے تاریاں نوں
پیا گھور دا سی
میں پچھیا‘
بادشاہو!
کیہ کر دے پءے جے
بولیا
سوچنا ہاں
زمین تے سمان دا رشتہ کیہ اے
پھل تے قبر دا رشتہ کیہ اے
مفت تے مل دا رشتہ کیہ اے
چن تے تاریاں دا رشتہ کیہ اے
چنگے تے مندے دا رشتہ کیہ اے
آقا تے بندے دا رشتہ کیہ اے
تیرا تے میرا رشتہ کیہ اے
رشتیاں وچ رہ کے
اسیں رشتیاں دی پہچان توں عاری ہاں
خورے ایسے پاروں
اکلاپے دی اگ وچ
سڑ دے بلدے پءے آں
تسی ای دسو
انج کیوں ایں
کیہ دسدا
میں آپوں صدیاں توں کلا ہاں
میں ہس پیا
اوہنوں کلا چھڈ کے
ٹر پیا