گم گشتہ خیالوں سے بے چین ہے دل میرا

گم گشتہ خیالوں سے بے چین ہے دل میرا
ماضی کے فسانوں سے بے چین ہے دل میرا

کل بیتا ، آج آیا ، کیا کھویا ،کیا ہے پایا
کچھ ایسے سوالوں سے بے چین ہے دل میرا

نہ کوئی نشاط تجھ بن ، یوں کٹی حیات تجھ بن
انجانے وسوسوں سے بے چین ہے دل میرا

نہ تصور خیالی، نہ یہ خوابوں کا گماں ہے
رہ کر بھی حواسوں میں بے چین ہے دل میرا

کیوں سکون سے ہوں عاری اک بے کلی ہے طاری
آسودہ زندگی میں بھی بے چین ہے دل میرا