ہر ایک شخص کو دشمن اگر بناؤ گے

ہر ایک شخص کو دشمن اگر بناؤ گے
مزاج پوچھنے والا کہاں سے لاؤ گے

جو سب کو اپنے ہی معیار پر پرکھتے رہے
تو زندگی میں کسے ہم سفر بناؤ گے

یہاں تو ہر کوئی چہرے پہ چہرے رکھتا ہے
اٹھا کے پہلو سے کس کو کسے بٹھاؤ گے

تمہیں اصول تمہارے ہی مار ڈالیں گے
نہ اپنے آپ کو ان سے اگر بچاؤ گے

چراغ جلنے لگیں گے تمہاری راہوں میں
جو دوسروں کے گھروں میں دیے جلاؤ گے

یہ عہد تم سے اگر ہو سکے تو کر لینا
ہمارے بعد کسی کا نہ دل دکھاؤ گے

نہیں جھکو گے اگر اک خدا کے آگے تم
نہ جانے کتنے دروں پر یہ سر جھکاؤ گے

وہ تم سے روٹھ گئی جو مکاں کی رونق تھی
غریب خانے کو اب کس لئے سجاؤ گے

سپرد خاک تو کر آئے ماں کو تم اطہرؔ
غموں کی دھوپ میں سایہ کہاں سے پاؤ گے

یہ بے حسوں کی ہے بستی تو پھر شکیلؔ یہاں
صداقتوں کا کسے آئنہ دکھاؤ گے