کسی نے پائی نہیں شان مصطفیٰ کی طرح (صلی علیہ و آلہ وسلم )

کسی نے پائی نہیں شان مصطفیٰ کی طرح
نہیں ہے کوئی بھی انسان مصطفیٰ کی طرح

خدا کے بعد نہیں کوئی آپ سے افضل
مرے حضور تو ہیں ہر لحاظ سے اکمل

خدا کی شان تو دنیا نے آپ سے جانی
عمل سے آپ کے قرآن کے کھلے معنی

نصیب جن کے دلوں کو ہوا ہے عشق حبیب
وہ لوگ دیکھو تو ہیں کس قدر خدا کے قریب

ہر ایک لمحہ برستی ہیں رحمتیں ان پر
ہیں دو جہاں میں خدا کی عنایتیں ان پر

نبی کے ذکر سے آؤ سجائیں محفل کو
چلے گا قافلہ اپنا حسین منزل کو

نبی و آل نبی کے ہی ذکر کا ہے اعجاز
کہ ہم فقیروں کو شاہوں سے بھی سوا ہے فراز

فضا میں پھیل گئی ہر طرف یہ کیسی مہک
جو روح تک کو معطر کرے ہے ایسی مہک

غموں کے چھائے وہ سارے سحاب دور ہوئے
دلوں کو چین ملا اضطراب دور ہوئے

نبی کے ذکر سے مشکل کو اپنی آساں کر
بجھی ہے دل میں جو شمع اسے فروزاں کر

( صلی علیہ و آلہ وسلم )

نوٹ: یہ نعت شریف رمضان کے بابرکت مہینے کی مناسبت سے دوبارہ
ارسال کر رہا ہوں کہ اسے وہ قارئین بھی پڑھ لیں جو پہلے نہ پڑھ پائے۔
تمام پڑھنے والوں سے التجا ہے کہ نعت شریف پڑھنے کے بعد مجھ
ناچیز کے حق میں دعا ضرور فرمائیں ،شکریہ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ناچیز ، زاہد