بچپن کے نام خط

ساری دنیا سے بات کر لی ہے
اب مجھے خود سے بات کرنی ہے

میں نے اک خط لکھا ہے بچپن کو
لوٹ آنے کی التجا کی ہے

اس میں باتیں ہیں کچھ شرارت کی
عقل و دانش کی گفتگو بھی ہے

دوستوں کا بھی ذکر ہے اس میں
دشمنوں کی بھی کچھ خبر لی ہے

کچھ نصیحت ہے اپنے آپ کو بھی
یہ روایت تو خاندانی ہے

ذکر ہے اس میں کچھ حسینوں کا
شوخ، چنچل سی اک پری بھی ہے

یہ بھی لکھا ہے عشق مت کرنا
اس بلا نے تو جان لے لی ہے

بے وفائی، جدائی، تنہائی
عشق کی بس یہی کہانی ہے

وصل کا دن تو مختصر ہے مگر
ہجر کی رات جاودانی ہے

زندگی میں کئی مسائل ہیں
یا مسائل میں زندگانی ہے

ریت کا ڈھیر ہے سمندر میں
کبھی صحرا میں صرف پانی ہے

زندگی مختصر سی ہے لیکن
اس کو جینے سے جان جاتی ہے

عمرِ رفتہ ہے اور عقلِ سلیم
ایک جاتی ہے، ایک آتی ہے

میرے خط کا جواب بھی آیا
اس نے لکھا کہ دیر کردی ہے

عشق کرنا بھی اختیار میں ہے؟
یہ عمل غیر اختیاری ہے

جس کسی راہ کو چنوں، آخر
وہ تمہاری طرف ہی آتی ہے

ایک چوراہے پر کھڑا ہوں میں
ہر گلی ہی اُدھر کو جاتی ہے

زندگی کی یہی حقیقت ہے
موت آنی ہے، جان جانی ہے

زندگی ایک گول چکر ہے
انتہا بھی تو ابتدا ہی ہے