صد رشک انجمن ہیں یہ تنہائیاں مری
Poet: بانو طاہرہ سعید By: Anila, Karachiصد رشک انجمن ہیں یہ تنہائیاں مری
سورج مرا ستارے مرے کہکشاں مری
مانا کہ قہقہے نہیں میرے نصیب میں
سرمایۂ نشاط ہے آہ و فغاں مری
ہر تلخ تجربے نے کہا ہنس کے مجھ سے یوں
آئیں گی کام تیرے یہی تلخیاں مری
رنگ بہار رنگ غزل رنگ خون دل
ڈوبی ہر ایک رنگ میں ہے داستاں مری
جھکتا نہیں یہ سر کسی سرکش کے سامنے
پایندہ باد رفعت فکر جواں مری
طوفان و انقلاب کے افسانے بن گئے
الٹا اثر دکھا گئیں خاموشیاں مری
جب طاہرہؔ ملے گا نہ نعم البدل مرا
یاد آئیں گی زمانے کو تب خوبیاں مری
Rate it: 
Views: 799
19 Jun, 2021
More Sad Poetry
