معرفت کے لئے آگہی کے لئے

معرفت کے لئے آگہی کے لئے
نور حق چاہئے روشنی کے لئے

جی رہے ہیں کسی کی خوشی کے لئے
ورنہ کیا ہے یہاں زندگی کے لئے

آپ اپنا تعارف سر انجمن
کتنا مشکل ہے اک اجنبی کے لئے

دشت غربت میں کچھ اور ممکن نہیں
جگنوؤں کے سوا روشنی کے لئے

رکھ دیے آبشاروں نے دل کھول کر
دشت میں ایک پیاسی ندی کے لئے

وقت کے آگے اس نے بھی رکھ دی سپر
جو تھا مشہور اپنی خودی کے لئے

رہبرؔ اعزاز عہدہ قیادت انا
مسئلہ بن گئے آدمی کے لئے