وہ رشکِ ماہ و سال جواں اب نہیں رہا

وہ رشکِ ماہ و سال جواں اب نہیں رہا
مجنوں مثال عشق کہاں اب نہیں رہا
بلبل کا غم، بیانِ خزاں اب نہیں رہا
گلشن میں پر بہار سماں اب نہیں رہا
عمرِ رواں دواں کی نہ رفتار پوچھئے
دیکھو پلک جھپکتے زماں اب نہیں رہا
ماضی یا حال دیکھتا ہوں آسمان پر
تارا نصیب کا تھا جہاں اب نہیں رہا
ہر سمت نفسانفسی قیامت کا ہے نشاں
حد ہے کہ امتیازِ نشاں اب نہیں رہا
کتنی بھی رنگارنگ ہو راہِ حیات رشک
منزل کا ذوق و شوق رواں اب نہیں رہا