يہ قول کسی کا ہے

يہ قول کسی کا ہے کہ ميں کچھ نہيں کہتا
وہ کچھ نہيں کہتا ہے کہ ميں کچھ نہیں کہتا

سن سن کر ترے عشق ميں اغيار کے طعنے
ميرا ہی کليجا ہے کہ ميں کچھ نہيں کہتا

بن آئی ہے جو چاہیں کہیں حضرت واعظ
اندیشہء عقبٰی ہے کہ میں کچھ نہیں کہتا

ان کا يہی سننا ہے کہ وہ کچھ نہيں سنتے
ميرا يہی کہنا ہے کہ ميں کچھ نہيں کہتا

دیکھو تو ذرا چشمَ سخن گو کے اشارے
پھر تم کو یہ دعوٰی ہے کہ میں کچھ نہیں کہتا

خط ميں مجھے اول تو سنائی ہيں ہزاروں
آخر یہی لکھا ہے کہ ميں کچھ نہيں کہتا

پھٹتا ہے جگر ديکھ کے قاصد کی مصيبت
پوچھو تو يہ کہتا ہے کہ ميں کچھ نہيں کہتا