کسی سبب سے نہیں اور کسی وتد سے نہیں

کسی سبب سے نہیں اور کسی وتد سے نہیں
شناخت اپنی بنائی ہے خود، سند سے نہیں

ہماری آنکھ کہیں اور جا لگی ہے میاں
ہمیں ذرا بھی غرض اب قبول و رد سے نہیں

خیال و حرف چرا کر ہماری غزلوں سے
کھڑے تو ہیں وہ مگر دیکھ پورے قد سے نہیں

گلے ملو کہ محبت پذیر ہیں ہم لوگ
بدی سے ہے ہمیں نفرت، کسی بھی بد سے نہیں

ہم اہل عشق تو امن و وفا کے داعی ہیں
وہ جس آگ لگائی، ہمارے جد سے نہیں

تمھارا سجنا سنورنا فضول ہے کہ ہمیں
تمھاری روح سے ہے عشق، خال و خد سے نہیں

ہوئے ہیں جس کے لیے خاک ہم سر بازار
ہمیں بھی چاہا تو اس نے، پہ شد و مد سے نہیں