ہماری آنکھ نہائی نہیں بہت دن سے

ہماری آنکھ نہائی نہیں بہت دن سے
تمہاری یاد بھی آئی نہیں بہت دن سے

بہت دنوں سے میں رویا نہیں ہوں جی بھر کے
کہ دل نے چوٹ بھی کھائی نہیں بہت دن سے

جدھر بھی دیکھو اندھیروں کی حکمرانی ہے
کسی نے شمع جلائی نہیں بہت دن سے

تمام گھر بھی مرے ساتھ بکھرا بکھرا ہے
جو تو نے زلف بنائی نہیں بہت دن سے

خدا ہی جانے میں کیسا ہوں کیسے حال میں ہوں
خبر خود اپنی بھی پائی نہیں بہت دن سے