وتعزُّ من تشاء وتذلُّ من تشاء

جو بھی ملا ہے مجھ کو مرے رب کی ہے عطا
بن مانگے بھی تو کیا نہیں اس نے مجھے دیا

پہچان مجھ کو دے کے مسلمان ہے کیا
سب عزتیں ہیں اس سے، وہی ہے مرا خدا

میرے لبوں سے گونج رہی ہے یہی صدا
وتعزُّ من تشاء وتذلُّ من تشاء

جو مانگتے ہیں سب سے انہیں تو ملے گا کیا
وہ جانتے نہیں تری رحمت کو اے خدا

تو انکو بھی نواز دے جو تجھ سے دور ہیں
گمراہیوں میں ڈوبے ہیں دل انکے چُور ہیں

جو جانتے ہیں تجھ کو انہیں اور تو بڑھا
وتعزُّ من تشاء وتذلُّ من تشاء

ایماں کی روشنی سے منور کیا ہمیں
کل کائنات کیلئے رہبر کیا ہمیں

جو ظلمتوں میں ڈوب رہے ہیں انھیں نکال
بھٹکے ہوؤں کی اے خدا سیدھی تو کردے چال

میرے نبی کے راستے پر تو ہمیں چلا
وتعزُّ من تشاء وتذلُّ من تشاء