Apni Hi Awaz Ko

Apni Hi Aawaz Ko Be_Shak Kaan Mein Rakhna
Lekin Shehar Ki Khamoshi Bhi Dhiyan Mein Rakhna

Mere Jhoot Ko Tolo Bhi Aur Kholo Tum
Lekin Apney Sach Ko Bhi Meezan Mein Rakhna

Kal Tareekh Yaqeenan Khud Ko Duhraye Gi
Aaj Ek Ek Manzar Ko Pehchan Mein Rakhna

Bazm Mein Yaaron Ki Shamsheer Ke Johar Dekho
Razm Mein Lekin Talwaron Ko Miyan Mein Rakhna

Is Dariya Se Aagay Ek Samandar Bhi Hai
Aur Wo Be_Sahil Hai Ye Bhi Dhiyaan Mein Rakhna

Is Mosam Mein Guldanon Ki Rasam Kahan Hai
Logo Ab Phoolon Ko Aatish Daam Mein Rakhna