Chup Hain Jo Log Wo Samandar Hain

Kuch Ajab Zindagii Ke Manzar Hain
Door Tak Rait Ke Samandar Hain

Merii Hii Raushanii Ke Paikar Hain
Chand Shaklein Jo Dil Ke Andar Hain

Dil Jo Thehare To Kuch Suragh Mile
Qarz Kis Kis Nazar Ke Ham Par Hain

Hai Barii Cheez Naazukii Dil Kii
Kis Se Kehiye Ki Log Patthar Hain

Khul Gaii Aankh To Khulaa Ham Par
Khwab Bedaariyon Se Behtar Hain

Khaamoshii Khud Hai Ek Geharaaii
Chup Hain Jo Log Wo Samandar Hain

Zakhm Par Kya Guzar Gaii 'Shayar'
Raiza Raiza Tamaam Nashtar Hain