Jab Log Hi Jazbon Ki Toukeer

Jab Log Hi Jazbon Ki Toukeer Nahi Kartay
Hum Bhi Koi Dukh Apna Tehreer Nahi Kartay

Dil Cheer Jaata Hai Lehjay Ka Yeh Rookha Pan
Karti Hai Zuban Woh Kuch Jo Teer Nahi Kartay

Mausam Agar Uksaaye Jab Chahe Chale Aana
Hum Raat Ko Darwaza Zanjeer Nahi Kartay

Likhtay Hain Woh Kuch Jo Har Aik Pay Guzarti Hai
Par Yun Keh Kahani Hum Tahreer Nahi Kartay

Do Gaz Hi Zameen Sab Ka Jab Aakhri Maskan Hai
Hum Koi Makaan Apna Taameer Nahi Kartay