Mushkil

Aashiqii Be-Dilii Se Mushkil Hai
Phir Muhabbat Usii Se Mushkil Hai

Ishq Aagaaz Hii Se Mushkil Hai
Sabr Karanaa Abhii Se Mushkil Hai

Ham Aasaa.N Hai.N Aur Hamaare Liye
Dushmanii Dostii Se Mushkil Hai

Jis Ko Sab Be-Vafaa Samajhate Ho.N
Bevafaai Usii Se Mushkil Hai

Ek Do Duusare Se Sahel Na Jaan
Har Koi Har Kisii Se Mushkil Hai 

Tuu Baa-Zid Hai To Jaa Faraz Magar
Vaapasii Us Galii Se Mushkil Hai