Qandeel-E Gham (Sialkot Ka Dukh)

Purnam Hay Meri Aankh Zamanay Ki Chaal Per
Nochay Hein Zalimoun Ne Shaheedoun Ke Baal-O Per

Dherti Meray Wattan Ki Shramsaar Ho Gayee
Nung-E Wattan Ke Zulm Ki Gandi Misaal Per

Be-Doush Maar Dala Na Aah-O Baka Suni
Kya Guzri Ho Gi Donoun Ke Jism-E Nadhaal Per

Ruktay Nahi Hain Ashk-E Rawan Dil Pe Hay Ghubaar
Sadmaat Itnay Guzray Hein Unn Ke Visaal Per

Toota Tha Ung Ung Baddan Tar Tar Thay
Ungint Zakhm Aaye Hein Masoom Gaal Per

Rotee Tou Ho Gi Maan Jo Kitaboun Ko Dekh Ker
Gham Hay Muheet Unn Ka Kayee Mah-O Saal Per

Shamil Hein Unkay Derd Mein Arz-E Wattan Ke Log
Gher Lout Ker Na Aaye Jo, Unn Ke Malaal Per

Qandeel-E Gham Sunati Hay Woh Daastan-E Gham
Ek Chup Si Lug Gayee Hay Dil-E Khasta Haal Per

Allah Muaaf Kerna Mushiyyat Thi Kya Teri ?
Na-Haq Ka Khoon Milta Hay Zalim Ki Dhaal Per

Phirtay Hein Aam Qattel Ke Mujrim Shehar Shehar
Insaaf Likh Liya Hay Darindoun Ne Khaal Per

Tum Fateha Bhi Padhtay Ho Logoun Ko Maar Ker
Hay Hukmraan ! Teri Seyasat Kamaal Per