Yahan Faqt Teri Chalti Hai

Sakoot-E-Shaam Mein Goonji Sadaa Udaasi Ki
K Hai Mazeed Udaasi Dawa Udaasi Ki

Amoor-E-Dil Mein Kisi Teesry Ka Dakhl Nahi
Yahan Faqt Teri Chalti Hai Ya Udaasi Ki

Bohat Shareer Tha Mein Aur Hansta Phirta Tha
Phir Ek Faqeer Ne Dey Di Dua Udaasi Ki

Chiragh-E-Dil Ko Zara Ehtiaat Se Rakhna
K Aaj Raat Chalay Gi Hawa Udaasi Ki

Bohat Dino Se Mulaqaat Hi Nahi Mohsin
Kahin Se Khair Khabar Ley K Aa Udaasi Ki