ایدھی تیرے جیسا میں اک دیوانہ ڈھونڈرہا ہوں

اک نئی دنیا ، اک نیا زمانہ ڈھونڈ رہا ہوں
رہنے کے لئے اک نیا آشیانہ ڈھونڈ رہا ہوں

دنیا کی حسرتیں جہاں کر سکوں میں دفن
اک ایسا مدفن، اک ایسا ویرانہ ڈھونڈ رہا ہوں

مر مٹتا ہے یوں تو شمع پہ ہر اک پروانہ
قرباں جس پہ شمع ہو ، وہ پروانہ ڈھونڈرہا ہوں

بنا دے سجا دے میری یہ زندگی بھی وہ زندگی بھی
اک ایسا در، اک ایسا آستانہ ڈھونڈرہا ہوں

جنوں جس میں ہو ، جذبہ بھی ہو خدمتِ خلق کا
ایدھی تیرے جیسا میں اک دیوانہ ڈھونڈرہا ہوں

میسر جس میں ہو جائے شرابِ معرفت رب کی
زمانے میں کاشف اک ایسا مہ خانہ ڈھونڈ رہا ہوں