ایک وکٹورین شخص سے

ایک وکٹورین شخص سے
بجائے اس کے
کہ تم مجھے سینت سینت کر
اپنے دل میں رکھو
الزبتھ دوم کے زمانے میں
عہدِ وکٹوریا کے آداب سیکھنے میں
اسی طرح زندگی گنوا دو
اورایک فقرے کی گفتگو کے لئے
یہاں سے وہاں تلک کا ادب کھنگالو
بہار کے پہلے دن کا ہرسال
میری کھڑکی کے نیچے تنہا کھڑے ہُوئے
انتظار کھینچو
بس ایک دن
دفعتاً
کہیں سے نکل کے آ جاؤ
اور مجھے
بازوؤں میں اپنے سمیٹ کر
ایڑیوں پہ تم اپنی گھوم جاؤ