بھیت اپنا ایہ کیویں کھولاں

بھیت اپنا ایہ کیویں کھولاں
جِگر جلایا تیرے بولاں

تُوں جے ہوویں نال مرے فِر
سورج پیراں ہیٹھ مدھولاں

جہڑا میرے دل وچ وسّے
اوہنوں جنگلاں وچ پیا ٹولاں

سجن نال کھلوتا ہووے
فیر بھلا میں کیویں ڈولاں

تیرے سَنگ بِناں میں سوہنیا
جندڑی کنڈیاں دے وچ رولاں

تُوں جے کول نہ ہوویں تے فِر
کِس اَگے جا دُکھڑے پھولاں

آئی وساکھی لُڈیاں پئیاں
اَت دے بھنگڑے پائے ڈھولاں

اوہنوں کُجھ نہ ہویا بزمی
ساڈیاں بھُج کے ہوئیاں ہولاں