جب اُس نے گفتگو ہی سے تاثیر کھینچ لی

جب اُس نے گفتگو ہی سے تاثیر کھینچ لی
میں نے بھی میل جول میں تاخیر کھینچ لی

پہلے تو میرے ہاتھ میں کشکول دے دیا
پھر یوں کِیا کہ وقت نے تصویر کھینچ لی

میرے گناہ ، کیا تری رحمت سے بڑھ گئے؟
پھر کیوں مری دعائوں سے تاثیر کھینچ لی؟

دل نے ابھی لیا ہی تھا تازہ ہوا میں سانس
فوراً کسی نے پائوں کی زنجیر کھینچ لی

اِک اختلافِ رائے پر اِس درجہ برہمی؟
کیوں دوست تُونے ہجر کی شمشیر کھینچ لی؟