دَر ِ ستارہ ء دُم دار کر کے وا کوئی

دَر ِ ستارہ ء دُم دار کر کے وا کوئی
عجب ادا سے مجھے دیکھتا رہا کوئی

گواہی دے رہے ہیں خود نقُوش ِ پا سَر ِ دشت
اِدھر سے گُزرا ہے ( پہلے بھی ) قافلہ کوئی

دُعائیں بیچنے والے ! چَل اِس نگر سے نکل
یہاں تو مُفت بھی لیتا نہیں دُعا کوئی

ہے یُوں تو دَہر میں کِتنوں سے آشنائی مِری
پَر ' آئنے سا نہیں دیر آشنا کوئی

اِسی لئے تو ہُوں ساحِر ! بُجھا بُجھا سا مَیں
مِری طرح کا نہیں اَور دِل جَلا کوئی