دھرتی لہو لہو، مری راہیں لہو لہو

دھرتی لہو لہو، مری راہیں لہو لہو
چہرہ لہو لہو ،مری بانہیں لہو لہو

کب دیکھیے کہ ہوں مری آنکھیں لہو لہو
سینہ لہو لہو، مری سانسیں لہو لہو

سڑکوں پہ بہہ چکا ہے لہو اس قدر کے آج
آہیں لہو لہو، ہیں، صدائیں لہو لہو

بیٹھے ہیں سوچ میں کہ ہے کس کا لہو گرا
محفل لہو لہو، ہے تو، باتیں لہو لہو

رب کے حضور سجدے کئے ہیں لہو میں آج
دامن لہو لہو، ہے ، دعائیں لہو لہو

اظہر وطن کی صبح، لہو میں نہا گئی
شامیں لہو لہو، ہیں تو، راتیں لہو لہو