صورت ِ تلخی ِ حالات نکل آتی ہے

صورت ِ تلخی ِ حالات نکل آتی ہے
جس کا خدشہ ہو وہی بات نکل آتی ہے

روشنائی کا ذخیرہ میں کہاں سے لاوں
روز اک جوئے عبارات نکل آتی ہے

چاند پھر کیوں نہ پھرے دشت ِ فلک میں تنہا
چاندنی شہر میں ہر رات نکل آتی ہے

جب بھی اٹھتا ہوں میں حالات بدلنے کے لیے
اک نئی صورت ِ حالات نکل آتی ہے

یہ شرف مجھ کو دیا اُن کی عزاداری نے
خلقت ِ شہر مرے ساتھ نکل آتی ہے

جب بھٹکتا ہے سر ِ راہ ِ تمنا یاور
رہ نمائی کو تری ذات نکل آتی ہے