غار میں بیٹھا شخص

چاند ستارے
پھول بنفشی پتے
ٹہنی ٹہنی جگنو بن کر
اڑنے والی برف
لکڑی کے شفاف ورق پر
مور کے پر کی نوک سے لکھے
کالے کالے حرف
اجلی دھوپ میں
ریت کے روشن ذرے
اور پہاڑی درے
ابر سوارسہانی شام
اور سبز قبا میں
ایک پری کا جسم
سرخ لبوں کی شاخ سے جھڑتے
پھولوں جیسے اسم
رنگ برنگ طلسم
جھیل کی تہ میں
ڈوبتے چاند کا عکس
ڈھول کی وحشی تال پہ ہوتا
نیم برہنہ رقص
کیسے کیسے منظر دیکے
ایک کروڑ برس پہلے کے
غار میں بیٹھا شخص