فسانہ

اے رات ذرا آہستہ چل
اے چاند ذرا تو بام پہ آ
اے آنکھ دریچے کھول ذرا
اے شوق فسانہ لکھ دل کا
اے درد ابھی کچھ دیر ٹھہر
یہ خواب ٹھکانے لگ جائے
اے یاد کوئی مشعل ہی جلا
دنیا نظر آنے لگ جائے

اے خواب ہمیں رسوا تو نہ کر
اک آس لگائے بیٹھے ہیں
اے سانس سنبھل کر راہوں میں
کچھ دیپ جلائے بیٹھے ہیں

اے عشق گزارا کیسے ہو
یہ جاں ہوئی جاتی ہے بیکل
اے عمر گواہی کس سے لیں
دامن میں ہے بس یہ ایک ہی پل
اے شمع نفس کچھ اور بھڑک
اے آرزو اب اشکوں میں ڈھل
اے رات ذرا آہستہ چل