قرآن راج

چپ ہو کہ مجھ میں تم بولتے ہو
ہے دل کے بربط پرانگلی تیری
چپ ہو کہ میرا دل تیرا مسکن ہے
گھر کے باسی
اپنی مرضی کے مالک ہوتے ہیں
چپ ہو کہ میرے شعور کی ہر کھڑکی میں
تیرا چہرا ہے
کھڑکی بند کرتے ہیں تو دم گھٹتا ہے
کھڑکی کھولے رکھنا
اندر کی باتوں کو باہر لانا ہے
باہر کے سارے موسم
راون بستی کے منظر ہیں
چپ ہو کہ سارے موسم تیرے ہیں
آنکھ دروازہ کھولو کہ
تیرے ہونٹوں کی مستی
اپنی روح کے کورے پنوں پر
آنکھوں سے چن کر رکھ دوں
چپ ہو کہ چپ میں سکھ ہے
چپ کے دامن میں
ہاں اور ناں کی لاکھوں گانٹھیں ہیں
چپ ہو کہ ہر گانٹھ
برہما کے بردان پر کھلتی ہے
بردان تو قسمت کے کھیسے کا بندی ہے
قسمت اچھی ہوتی تو
راکھشش جیون پر اس
قرآن راج نہ ہوتاِ؟