مٹی ول کیہہ ویکھنا

مٹی ول کیہہ ویکھنا بیلی مٹی میل دی بھین
ویکھیئے نت یار دے ولے ملے سکون تے چین

یاری لائیے مولا دے نال ملے ودھیر ودھائی
یار دے باہجوں ککھ نئیں دنیا ہور نئیں گل کائی

سجناں دے بن دن نہ بیتن۔ نا ہی بیتن رین
پھلاں وچوں سولاں دسن، راگ سنیچن بین

سجن میرے دل دا جانی، سچا پیار ہے اس دا
رکھے ہر دم وچ پناہ دے، درشن دیوے مکھ دا

سجن آپے یاری لاوے ، آپے توڑ چڑھاوے
آپے سُٹے آتش دے وچ ، آپے آن بجھاوے

سجن دسے ہر شے وچوں، رکھ نظر دا پردہ
پردے اندر رہ کے سارے کم اوہ ظاہر کردا

پھلاں، کنڈے ، اتھرو، ہاسے ، سب کج انہدے ولوں
انہدے در توں منگن والے تھڑ دے نا ں کسے گلوں

رب دے اگے مرتضائیؔ عجز و عجزی ہوئیے
چنگے مندے عملاں پاروں اسدے اگے روئیے