ہیں ماضی کی حسیں یادیں و میری شام تنہائی

ہزاروں دیپ ہیں روشن مگر دل میں اندھیرا ہے
ہوئے ہیں مبتلائے غم تو اس میں نام تیرا ہے

یہ کس امید پر کاٹی ہمیں معلوم ہی کیا تھا
شب غم کے مقدر میں نئے غم کا سویرا ہے

ہیں ماضی کی حسیں یادیں و میری شام تنہائی
جہاں خوشیوں کے میلے تھے وہاں آہوں کا ڈیرا ہے

کہاں جائیں ، کدھر ڈھونڈیں تجھے اے دوست دنیا میں
نجانے آج کل کس ملک میں تیرا بسیرا ہے

خزاں کا دور ہے ہر سو ، ہر اک جانب ہے ویرانی
گئے کیا تم بہاروں نے چمن سے منہ کو پھیرا ہے

سمٹ کر رہ گئی ہے زندگی ، اب جس طرف دیکھیں
تری یادوں کا پہرا ہے ، تری یادوں کا گھیرا ہے