مچھ واقعہ، ملوث افرادکو جلد کٹہرے میں لائینگے، آرمی چیف

آرمی چیف جنرل قمر جاوید باجوہ نے کوئٹہ کا دورہ کيا اور مچھ واقعے میں شہید کان کنوں کے لواحقین سے ملاقات کی، ان کا کہنا ہے کہ بلوچستان پاکستان کا مستقبل ہے، بلوچستان کی ترقی و خوشحالی ملک کی ترقی ہے۔

پاک فوج کے شعبہ تعلقات عامہ (آئی ایس پی آر) کے مطابق  آرمی چیف جنرل قمر جاوید باجوہ نے بدھ کو کوئٹہ کا ایک روزہ دورہ کیا، سدرن کمانڈ ہیڈ کوارٹرز میں انہیں سیکیورٹی صورتحال اور چیلنجز پر بریفنگ دی گئی۔

آرمی چیف کو پاک افغان اور ایران سرحد پر سیکیورٹی انتظامات سے متعلق بھی آگاہ کیا گیا۔

آئی ایس پی آر کے مطابق آرمی چیف نے ہزارہ برادری کے ساتھ ملاقات کی اور مچھ واقعے میں شہید کان کنوں کے لواحقین کے ساتھ وقت گزارا۔

انہوں نے بات چیت کرتے ہوئے کہا کہ شہداء کا خون رائیگاں نہیں جائے گا اور لواحقین کو یقین دلایا کہ اندوہناک واقعہ میں ملوث افراد کو جلد کٹہرے میں لایا جائے گا۔

آرمی چیف کا کہنا تھا کہ بلوچستان پاکستان کا مستقبل ہے، بلوچستان میں ترقی سے ہی ملک میں ترقی ہوگی، ملک دشمن قوتوں کو انتشار پھیلانے میں کامیاب نہیں ہونے دیں گے۔

بلوچستان کے علاقے مچھ میں 3 جنوری کو داعش کے دہشت گردوں نے ہزارہ برادری سے تعلق رکھنے والے 10 کان کنوں کو قتل کردیا تھا، جس کے بعد لواحقین نے 6 روز تک کوئٹہ کے مغربی بائی پاس پر دھرنا دیا تھا۔

اس سے قبل وزیراعظم عمران خان بھی ہفتہ کو کوئٹہ کا دورہ کرچکے ہیں، اس دوران انہوں نے متاثرین سے ملاقات بھی کی تھی۔


 

WATCH LIVE NEWS

Samaa News TV PTV News Live Express News Live 92 NEWS HD LIVE Pakistan TV Channels

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

117