گھر بھر کی آنکھوں کے تارے چھوٹے چھوٹے بچے

ننھے منے پیارے پیارے چھوٹے چھوٹے بچے
گھر بھر کی آنکھوں کے تارے چھوٹے چھوٹے بچے

ان کے دم سے گھر کی رونق ان کے دم سے رحمت
جس گھر میں ہوں چھوٹے بچے اس گھر میں ہو برکت
ان کے دم سے خوشیاں ہیں ان کے دم سے راحت
بچے نہ ہوں گھر میں تو کس کام کی خالی دولت ہے
گھر بھر کے ہیں راج دلارے چھوٹے چھوٹے بچے
گھر بھر کی آنکھوں کے تارے چھوٹے چھوٹے بچے

سندر سندر من موہنے معصوم نگاہوں والے
ضدی بچوں کی ضد کے بھی ہیں انداز نرالے
جانتا ہے وہ جس نے بچے لاڈ پیار سے پالے
دل کے نازک ہوتے ہیں یہ بچے بھولے بھالے
چندا ماما سے بھی پیارے چھوٹے چھوٹے بچے
گھر بھر کی آنکھوں کے تارے چھوٹے چھوٹے بچے

آنکھوں میں شرارت ان کی ہونٹوں پہ مسکانیں
گھر والوں کو بھاتی ہے ان کی یہ عادت جانیں
اپنے من کی سنتے ہیں یہ کسی کی بات نہ مانیں
منواتے ہیں اپنی ہر بات ہم مانیں یا نہ مانیں
واہ واہ واہ واہ واہ رے واہ رے چھوٹے چھوٹے بچے
گھر بھر کے ہیں راج دلارے چھوٹے چھوٹے بچے

پھولوں جیسے نرم و نازک رنگوں سے رنگیں
والدین کو لگتے ہیں یہ ہر شے سے حسین
شفقت سے چومیں جب ان کا چہرہ اور جبین
خوشی سے ہو جاتے ہیں بچے اور بھی حسین
ہوں تمہارے یا ہمارے چھوٹے چھوٹے بچے
گھر بھر کی آنکھوں کے تارے چھوٹے چھوٹے بچے

ننھے منے پیارے پیارے چھوٹے چھوٹے بچے
گھر بھر کی آنکھوں کے تارے چھوٹے چھوٹے بچے